Visítanos en FACEBOOK
 
Últimas Noticias
 
Noticias
AS PRAIAS DO SALNÉS COMO LUGAR DE IMPORTANCIA PARA A NIDIFICACIÓN DA PÍLLARA DAS DUNAS
17/10/2016

Píllara das dunas (Charadrius alexandrinus).

Unha vez finalizada a tempada de cría o grupo local SEO-Pontevedra presenta os resultados do seguimento da poboación reprodutora de píllara das dunas nas praias do Salnés durante 2016, sendo o quinto ano que se custodian os niños nestes areais en colaboración cos vixiantes de Medio Ambiente da Xunta de Galicia.

A píllara das dunas (Charadrius alexandrinus) é unha ave limícola pequena, cuxa poboación española se sitúa sobre todo na costa mediterránea e andaluza, mentres que a poboación da costa do norte peninsular só se atopa en Galicia.

O tamaño actual da poboación galega e a concentración de exemplares nun reducido número de localidades convértena nunha especie altamente vulnerable fronte a acontecementos demográficos e medioambientais, é por isto que foi clasificada “Vulnerable” no Catálogo Galego de Especies Ameazadas, polo que a Xunta aprobou o Plan de Conservación da píllara das dunas en Galicia.

A área de estudo foi a península do Salnés (Pontevedra), onde as píllaras das dunas son comúns todo o ano e onde nidifican en praias do concello do Grove e Sanxenxo, aínda que durante esta tempada 2016 só se puido confirmar a reprodución na praia da Lanzada, do Grove, estando ausentes como nidificantes nas praias como Area da Cruz e Mexiloeira (O Grove) e Montalvo (Sanxenxo), aínda que si houbo presenza de individuos na primavera en todos estes areais.

Por iso ao longo do período reprodutor as actuacións para favorecer a súa reprodución desenvolvéronse maioritariamente na praia da Lanzada.

Este ano as medidas de conservación da píllara das dunas leváronse a cabo entre o 19 de marzo e o 20 de setembro e centráronse en:

1. Xestións ante as administracións e organismos implicados na conservación da especie, tanto a nivel comunitario, como provincial e local.

2. Actuacións directas nas praias, con 103 horas de control por parte dos voluntarios do grupo local SEO-Pontevedra consistentes en:

- Localización e protección de niños mediante gaiolas e parcelas de exclusión e vixilancia a distancia de niños e polos.

- Información da situación aos donos de cans que, infrinxindo a lei, os baixan á area.
- Información aos operarios da limpeza das praias e a diferentes colectivos que traballan nela.

- Educación ambiental en colexios e xornadas de educación ambiental para os usuarios da praia da Lanzada.

- Medidas de participación social con voluntariado, como a limpeza da duna da Lanzada, unha vez finalizada a tempada de cría.

3. Outras actuacións divulgativas consistiron en dar a coñecer o día a día da evolución dos niños e os problemas cos que se enfrontan as píllarass en blogs, whatsapps e foros de aves, en entrevistas en radio e prensa escrita, en documentais como “El escarabajo verde” e “La aventura del Saber”, de TVE2, en conferencias en distintos eventos etc.

Pese ás medidas de conservación adoptadas, o fracaso dunha posta e a mortandade de pitos segue sendo considerable, sobre todo nas dúas primeiras semanas de vida.
Os factores adversos máis patentes cos que se enfrontan as píllaras das dunas na praia da Lanzada resultaron ser as perturbacións humanas (presión demográfica, usuarios cruzando a duna, actividades como kitesuf, celebración do Día dos Castelos de Area que congregou máis de 800 nenos etc. Toda esta presión produce molestias na incubación, dificultades na obtención de alimento e estrés de adultos e polos.
Outro factor contrario foi a presenza continua de cans na Lanzada, que causan estrés nas aves e depredación de pitos.

Tamén cómpre destacar a incidencia de depredadores naturais, así como a climatoloxía adversa con preamares coincidentes con temporais que provocaron a destrución dalgún niño, pero que forman parte do proceso natural.

Malia todos estes obstáculos, o éxito da reprodución durante este 2016 foi maior que nos cinco anos anteriores e en parte pode deberse á decisión do Concello de retirar a máquina cribadora de area (que ademais de eliminar as algas, fonte de alimento das píllaras, destrúe niños e causa morte de polos novos), e eliminar as 27 illas de colectores de lixo que se repartían pola Lanzada, (que non só eran focos de atracción de depredadores, senón que facían que a camioneta de recollida de residuos circulase pola area, podendo destruír ovos e matar pitos).

Como recomendacións para anos vindeiros, queremos destacar que é urxente manter todo o ano os carteis de prohibición de cans nos accesos aos areais onde cría a píllara das dunas, xa que os cans non só supoñen un problema de saúde pública, senón que poden producir abandono de niños e depredacións de poliños, poñendo en perigo unha especie ameazada, ademais de ser un risco para o resto de fauna e vexetación propias destes hábitats tan sensibles.

Sendo A Lanzada un espazo natural protexido pertencente á Rede Natura 2000 (a Rede de Espazos Protexidos máis importantes de Europa, cuxa función é asegurar a supervivencia dos hábitats e as súas especies) e sendo ademais Reserva Ornitolóxica do Grove de SEO/BirdLife, é unha praia incompatible coa presenza de cans durante todo o ano.

Como conclusión, seguimos mantendo que o turismo de praia e a cría de píllara das dunas ata certo punto é compatible, pero é necesario seguir tomando medidas de conservación para que a poboación desta limícola non se extinga como reprodutora das nosas praias, tal como ocorreu no resto do norte peninsular.

 
81 ESPECIES DE AVES
03/10/2016

Alguns participantes da saída.

Este domingo 2 de outubro en Galicia, a Sociedade Española de Ornitoloxía (SEO) celebrou o Día das Aves no Complexo Intermareal Umia-O Grove, por ser un dos mellores lugares do norte peninsular para a observación de aves acuáticas.

O día amenceu con tempo fresco pero asollado. A media que as horas avanzaban, as temperaturas foron subindo e puidemos gozar dun tempo moi agradable, o que animou unhas 30 persoas a participaren nesta excursión.

Comezamos a ruta no miradoiro da Pantoeira para observar as aves mariñas da baía da Lanzada. Aquí xa divisamos furabuchos baleares e balsas de pardelas cincentas, pentumeiros, mascatos, corvos mariños cristados, gaivotas patiamarelas, choronas, escura e cabecinegras, ademais de pilros gordos, tridáctilos e virapedras. Sobre este miradoiro alimentábanse un bando de cirrios pálidos que entusiasmaron o grupo de participantes.

Logo desta primeira toma de contacto coas mariñas, empezamos o percorrido polo Complexo Intermareal, facendo paradas en distintos puntos para divisarmos as diferentes especies.

Dentro do grupo de limícolas observamos: gabitas, pilros comúns e miúdo, píllaras reais, píldoras cincentas, mazaricos rabinegros e rubios, mazaricos reais e chiadores, e biluricos comúns e claros. Tamén miramos ardeidos como garza real, garzota común e garzota grande. E gozamos con gran pracer de máis de 200 cullereiros.

Localizamos os primeiros patos da tempada como os patos comúns, patos asubiadores, patos frisados, patos cullerete e cercetas comúns.

Nas zonas lacustres da contorna, alleas á nosa presenza, nadaban galiñolas negras, galiñolas e mergullons pequenos.

De aves rapaces miramos tres magníficas aguias calzadas, tartarañas das xunqueiras, miñatos, gabián e azor.

E de paxariños: pica de Richard, laverca, papuxa común, picafollas musical, picapeixe, rousiñol bravo, peto verde, peto real, gaio, pombo torcaz, rula turca, xílgaro, verderolo, xirín, etc, etc.

Divisamos tamén un corvo mariño grande que se move polo Complexo e que leva anelas. Este corvo mariño que foi anelado no niño o 19/5/2016, por Loï Marion, en Loira, Francia, decidiu pasar con nos o inverno.

Foi un precioso Día das Aves no que gozamos dun clima apracible, da beleza da paisaxe e de 81 marabillosas especies de aves.

 
CELEBRA O DÍA DAS AVES 2016
19/09/2016

Chega unha nova edición do Día das Aves!

Durante a primeira fin de semana de outubro achegaremos o fascinante mundo das aves aos cidadáns. Trátase do principal evento participativo organizado por BirdLife International a escala mundial e que en España coordina SEO/BirdLife.

Que festexamos o Día das Aves?

Convivimos coas aves e, con todo, son descoñecidas para moitas persoas. A presenza e proximidade das aves mellora a nosa saúde ambiental. Achégannos vida, cor e alegría, achegan a natureza ás cidades e son grandes viaxeiras que non teñen fronteiras, pois non entenden de barreiras culturais e políticas.

O día 2 de outubro invitámoste a gozar coas aves. Observa a beleza e colorido das súas plumaxes. Escoita os seus harmoniosos cantos.

Coñece a rica variedade de aves do noso país, fundamental no mantemento da biodiversidade europea.

”Achégate ás aves e énchete de natureza”, é a mensaxe que imos transmitir nesta edición do Día das Aves.

Como queremos que este día se celebre en todos os recunchos do noso país, en Galicia SEO elixiu O Grove, e máis concretamente, o Complexo Intermareal Umia-O Grove, non só porque é un dos mellores lugares de Galicia en acollida de aves, xa que máis de 13.000 acuáticas, entre limícolas, patos, garzas, aves mariñas..., invernan nesta espazo protexido, senón porque este concello conta coa primeira Reserva Ornitolóxica de Galicia e a maior Reserva Ornitolóxica de SEO/BirdLife de España.

O domingo 2 de outubro realizando un itinerario gratuíto e aberto ao público por este máxico lugar e guiados por ornitólogos de SEO-Pontevedra.

Se queres participar no Día das Aves só tes que enviar un correo a: Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo e darémosche máis información.

Anímate e participa!

Esperámoste.

MIRA ESTE VIDEO, GUSTARACHE!!

 
UNHA AVE ÚNICA NO MUNDO
05/09/2016

Furabuchos balear (Puffinus mauretanicus). Foto de Juan Gómez.

Dedicaremos esta breve noticia para dar a coñecer outra marabilla do mar. Un endemismo da península Ibérica, é dicir, un ser vivo cuxa área de distribución é única e limitada.

Trátase do furabuchos balear (Puffinus mauretanicus), ave mariña endémica de España, pois non a hai en ningunha outra parte do mundo.

Por desgraza, o furabuchos balear tamén é a ave máis ameazada de Europa, isto é, que corre perigo de desaparecer nun curto espazo de tempo se non se toman medidas para evitalo. Por iso está catalogada “En perigo crítico de extinción”, é dicir, que se enfronta a un risco moi alto de extinción.

Todo isto porque a súa poboación mundial é dunhas 3.000 parellas reprodutoras.

Imaxinádesvos que os seres humanos só fósemos uns seis mil en todo o planeta, en lugar de sete mil millóns?

Este declive do furabuchos balear é debido ás ameazas coas que se enfronta e que están relacionadas coa mortalidade por causas non naturais como as capturas en palangres, a depredación por gatos e ratas introducidos polo home nas illas onde crían, a sobreexplotación pesqueira dalgunhas das súas especies presa, a perda e degradación de hábitat (urbanización costeira), ou pola contaminación de hidrocarburos.

A pesar dos estudos demográficos e dos avances que veñen realizando desde 2004, o prognóstico para a especie non mellorou. “O furabuchos balear voa cara á extinción e todo apunta de novo cara ás capturas accidentais como a súa principal ameaza”.

O furabuchos balear só cría nas illas Baleares (en tobos e fendas de cantís), pero coas súas estreitas e longas ás pode sucar os ventos planeando sobre o mar longas distancias, e así, despois do período reprodutivo e para buscar alimento, a maior parte da poboación abandona o Mediterráneo, cruza o estreito de Xibraltar rodeando toda a península Ibérica e pode chegar ao Atlántico e ao Cantábrico, xa sexa ao golfo de Biscaia, e mesmo preto do Mar do Norte ou ben se despraza cara ao noroeste de África.

Tras o período de muda, desfán o andado e os furabuchos regresan ás costas peninsulares mediterráneas para pasar o inverno.

Nestas viaxes migratorias por mar, os furabuchos pasan por diante das costas galegas e entran nas rías en busca dos seus ricos recursos alimenticios, principalmente bolo pequeno (Ammodytes tobianus), pequenos peixes que capturan mergullando, por iso na nosa rexión, no Grove son fáciles de observar desde a costa.

Na baía da Lanzada un bo lugar de observación é o miradoiro da Pantoeira, desde onde se contabilizaron ata 1000 exemplares alimentándose. Tamén no extremo noroeste do concello grovense, en Punta Pateiro, aquí víronse máis de 1000 furabochos baleares en outubro cruzando da ría de Pontevedra á ría de Arousa.

Aínda que os furabuchos veñen entre maio e outubro á nosa localidade, son xuño, xullo, setembro e outubro os mellores meses para observalos.

Para recoñecelos hai que fixarse na súa cor parda, en que se moven en pequenos bandos que adoitan voar preto da superficie da auga, alternando movementos das alas rápidos con curtos planeos, ou que cando pousan sobre o mar o seu tamaño é máis pequeno e compacto que o das gaivotas patiamarelas.

Desde estes puntos da costa peninsular meca pódense facilmente observar furabuchos baleares, tan escasos e únicos, e contaxiarse da alegría que transmiten cando voan de aquí cara alá ou da paz que irradian cando flotan delicadamente sobre o mar.

 
AS ALGAS NON SON LIXO
15/08/2016

Píllara das dunas dunha praia do O Grove. Fotografía de Juan Gómez.

Estamos afeitos considerar as praias como parques urbanos, como lugares de lecer ou meros obxectos de consumo, e as praias nin son espazos artificiais nin simples extensións de area estéril, senón que son ecosistemas naturais e vivos, polo que deben tratarse de forma respectuosa e coidadosa para que conserven a súa boa saúde, da que todos nos beneficiaremos.

Son as algas varadas na area os bioindicadores do bo estado de conservación das praias, xa que lles proporcionan múltiples beneficios:

1º. As algas son hábitat e alimento de máis de 50 especies de macroinvertebrados, algúns protexidos, e como esta é unha web dedicada ás aves, cómpre dicir que estes pequenos invertebrados son á súa vez o alimento de distintas aves, como a píllara das dunas, especie ameazada e protexida en Galicia.

2º. Se estas poboacións de animais consumidores de algas están en bo estado, serán elas as encargadas de eliminar de forma natural as algas da area.

3º. Os nutrientes que liberan as algas varadas na beira volven finalmente ao mar, deste xeito fertilízano e favorecen a súa produtividade.

4º. As algas, ademais, reteñen a area arrastrada polo vento e son as encargadas de fertilizar tamén as plantas dunares pioneiras, o que propicia así a formación da duna. E é sabido que as dunas son as que protexen a costa da erosión do mar e do vento, ademais de seren as reservas de area das praias. Se as dunas se destrúen, as praias tenden a erosionarse e desaparecer.

Todo este proceso forma parte da cadea trófica costeira que garante a boa saúde da praia.

Pero cando as algas varadas nas beiras se eliminan artificialmente estase provocando unha grave alteración ecolóxica que dá lugar a praias estériles e insalubres.

A praia da Lanzada, no Grove, está dentro da Rede Natura 2000 (que é a rede de espazos protexidos máis importantes de Europa, cuxa función é asegurar a supervivencia dos hábitats e as especies que os ocupan), e forma parte da Reserva Ornitolóxica de SEO/BirdLife.

Ademais, está clasificada polo Plan de conservación da píllara das dunas da Consellería de Medio Ambiente da Xunta de Galicia, como Área Prioritaria de Conservación ou, o que é o mesmo, espazo vital para a supervivencia da píllara das dunas, especie ameazada en Galicia.

Por todo iso, o Concello do Grove tomou a decisión de non facer limpeza mecánica e non pasar a máquina cribadora de area pola Lanzada, só se fará en casos moi puntuais e logo de pedir as autorizacións correspondentes. A cambio, a limpeza será manual e selectiva. Só se retirarán plásticos, vidros, latas...

Tamén hai que engadir que se retiraron as illas de colectores de residuos que había no areal que, asemade de seren focos de atracción de depredadores, facían que a camioneta de recolleita circulase pola area poñendo en perigo animais e plantas.

Por todo isto o Concello do Grove está sendo todo un exemplo de que a conservación do patrimonio natural é perfectamente compatible co turismo de sol e praia, e sabemos que outros concellos costeiros xa se están interesando polo seu modelo respectuoso coa natureza e que lle ofrece á vez ao turista praias sas e naturais.

Recordemos que as algas non son lixo, senón un elemento natural dos nosos areais. Xa que logo, debemos respectar as algas depositadas na ribeira.

 
<< Inicio < Anterior 1 2 3 4 5 6 7 8 9 10 Seguinte > Final >>

JPAGE_CURRENT_OF_TOTAL
Añadir a: Yahoo Añadir a: Google Añadir a: Facebook Añadir a: Twitter
Castellano
Galego
English