Visítanos en FACEBOOK
 
Últimas Noticias
 
Noticias
EL CHORLITEJO. DÍA. D.
17/08/2018

 
XORNADAS DE SENSIBILIZACIÓN E DIVULGACIÓN NA PRAIA DO GROVE
31/07/2018

Os domingos 22 e 29 de xullo celebramos dúas "Xornadas de Sensibilización e Divulgación" na praia do Grove onde temos pitos de píllara das dunas.

Despois de montar os telescopios e dirixilos á familia de píllaras da praia, os usuarios desta foron invitados polos voluntarios de SEO-Pontevedra e por membros do Concello do Grove da área de Medio Ambiente a descubrilos.


Durante dous días centos de persoas pasaron polos telescopios e a todos lles cambiaba a cara por un gran sorriso cando de súpeto vían tres poliños patilongos e de cor abrancazada corricando pola area. E non podían entender como uns seres tan indefensos saían adiante nun espazo tan ateigado de xente.


Explicóuselles a importancia de conservar esta especie ameazada, porque entre outras cousas é un bo indicador da saúde ambiental da praia, tamén o porqué de non levar cans, de deixar as algas na area ou de ser esta un dos poucos areais de Galicia que non ten papeleiras, e que os usuarios xa concienciados manteñen en perfecto estado.


Tamén lles repartimos folletos do "Grupo Píllara" e lles regalamos marcapáxinas ilustrados con píllaras das dunas, creados por SEO-Pontevedra.


Un ano máis estas accións resultan moi produtivas e cunha alta participación e están sendo un exemplo para copiar por outros concellos que tamén teñen esta especie protexida nas súas costas.

 
MÁIS PITOS DE PÍLLARA DAS DUNAS
14/07/2018

O día 8 de xullo naceron tres novos pitos de píllara das dunas, do niño 4 instalado na praia do Grove.

A día de hoxe aínda seguen vivos e están ben.

Dos polos das niñadas anteriores nados neste areal, só sobreviviu unha píllara, que xa abandonou a praia, aínda que ás veces chegan visitantes xuvenís de píllara das dunas nados noutros areais.

Xuvenil de píllara das dunas nado na praia de Louro e que visitou o noso areal. 10/07/2018. G. Ferreiro.

Desexamos que estes tres poliños tamén poidan chegar a voar, porque a pesar dos innumerables carteis que prohiben cans na praia...

 

...das continuas chamadas de atención por parte dos voluntarios de SEO-Pontevedra e dos vixilantes do espazo protexido...

 

...de varias multas da policia local...

e tendo un areal canino moi preto,  cada día xente incívica continúa levando cans por onde os poliños corren libres.

 

Can na praia onde hai píllara das dunas. 10/07/2018. G. Ferreiro.

É unha postura moi egoísta que as persoas non queiramos aceptar cal é a prioridade: se a dos nosos animais domésticos que non corren ningún risco de extinguirse ou a dos animais silvestres que teñen que sobrevivir por si sós nun mundo cada vez máis humanizado e que ademais están en perigo de desaparecer para sempre.

 

Poliño do niño 4. 14/07/2018. G. Ferreiro,

 
TURISMO SAUDABLE
02/07/2018

Paisaxe do Grove. E. González.

Nacións Unidas  considerou a importancia do Turismo Sustentable para o Desenvolvemento. Unha chamada de atención cara a un sector que xoga un papel esencial na economía de moitos países, entre eles España, e que cando non cumpre unhas regras mínimas de respecto ambiental carréxalle numerosos prexuízos á xente, aos hábitats e á biodiversidade.

O ecoturismo contribúe ao goce humano, á conservación da natureza e á cooperación socioambiental. Turismo, ademais, saudable, debido a que repercute de forma decidida no bo estado físico e mental das persoas e, por extensión, no emocional.

Nacións Unidas considera o turismo un importante motor de desenvolvemento sustentable nas súas tres dimensións –económica, social e ambiental–, ademais dun instrumento positivo para educar, erradicar a pobreza, protexer o medio ambiente, mellorar a calidade de vida, empoderar economicamente as mulleres e os mozos, e crear empregos decentes. Para poñer todo isto enriba da mesa alenta a todos os estados e responsables na toma de decisións a promover medidas, en particular mediante a cooperación internacional, mobilizando á vez os grupos de interese para facer do turismo un catalizador de cambio positivo.

SEO/BirdLife ten unha Rede de Reservas Ornitolóxicas formada por dez espazos que se distribúen pola xeografía nacional e sobre os que desenvolve distintas fórmulas de xestión ou relación con concellos ou propietarios privados. Case todas constitúen un claro destino de ornitoturismo. É o caso de Riet Vell, no Delta do Ebro; El Planerón, no val do Ebro; Las Marismas Blancas, en Astillero; Los Albardales, na Comunidade de Madrid, ou El Oso, na Moraña (Ávila). Nelas teñen lugar encontros e excursións ornitolóxicas, nas que se observan especies mariñas, esteparias, acuáticas, rapaces ou paseriformes.

Un destes dez espazos témolo en Galicia. É a Reserva Ornitolóxica do Grove, creada hai uns anos pola súa abundancia, diversidade de aves e calidade ambiental.

Esta reserva ornitolóxica situada na península do Grove cobre boa parte do termo municipal. É a reserva máis grande de España, a única en Galicia e a primeira que conta con medio mariño.

Na nosa reserva non só se pode gozar da fauna e das súas fermosas paisaxes, senón de moitos elementos máis que entran dentro dos intereses destas saídas campestres, nas que a miúdo se mesturan tamén aspectos etnográficos, culturais ou gastronómicos.

É a reserva idónea para practicar o turismo máis saudable.

Otanthus maritimus. Planta das dunas do Grove. E. González.

 
PRAIAS E PÍLLARA DAS DUNAS
14/06/2018

Niño de píllara das dunas. 12/06/2018. O Grove. G. Ferreiro.

É posible que o vises correr pola area da túa praia favorita, pero sabes por que comparte toalla contigo? Os areais son o lugar de cría da píllara das dunas, un ave habitual da costa mediterránea e que tamén está presente en Galicia. O seu estado de conservación é vulnerable e, ás veces, a presenza do ser humano non axuda, sobre todo en época reprodutora. Pero estas molestias, que poden acabar afectándolles ás crías, pódense minimizar. Concellos coma o do Grove xa deron o paso. Agora falta o resto.

Cando chegan as pontes e as vacacións esténdense parasoles, cadeiras, toallas e neveiras. Os visitantes corren, practican deporte, estenden os seus parapentes ou pasean os seus cans esquecendo que comparten praia cunha especie que non pasa polo seu mellor momento. De feito, a actual poboación reprodutora de píllara das dunas mostra unha tendencia negativa desde hai anos. A principal causa desta regresión débese á forte presión que soporta no seu principal hábitat de cría, os areais. Esta situación levouna de cabeza a ser catalogada como Vulnerable no Libro Vermello das Aves de España. Ademais, está incluída no Anexo I da Directiva de Aves.

A píllara das dunas é unha ave limícola e, como tal, aliméntase rebuscando entre as algas que traen a marea e as ondas. Estas plantas mariñas, que adoitan verse como sucidade ou molestia na praia, xogan con todo un papel fundamental para o ecosistema: fertilizan o mar a través do lixiviado dos nutrientes e proporciónanlles refuxio a unha ampla variedade e riqueza de invertebrados. Pero hai máis: a falta de vexetación nas praias leva ás especies que as habitan a depender destas achegas externas vidos do océano para obter o alimento necesario. E entre os depredadores destes invertebrados das algas atópase a píllara das dunas, que se beneficia de tan escaso recurso durante todo o ano.

No inverno, as píllaras teñen a necesidade de facerse con máis recursos para poder crear unha capa de graxa protectora, pero é a tempada reprodutora a que lles demanda un maior esforzo para poderen alimentar a súa prole. Adoitan criar uns tres pitos en cada posta. Antes de naceren, os ovos son depositados na area, sen ningún tipo de protección. A femia simplemente os deixa semisoterrados e o aspecto críptico dos ovos —con pintas e de cor similar á area— fai todo o traballo. A misión é pasaren completamente desapercibidos.

O sistema de praias e dunas non só xoga un papel importante para a alimentación desta especie, senón que se trata do súa nicho ecolóxico, no que ademais crecerán as futuras xeracións.

O principal obstáculo ao que se enfrontan agora as poboacións de píllara é que algunhas actividades de mantemento do turismo nas praias, ao principio consideradas como inocuas, impactan sobre a especie. É o caso, por exemplo, da limpeza mecánica das praias ou o paso de máquinas cribadoras que provocan a perda dun hábitat singular, a retirada de acumulacións de algas —o que deixa a praia sen os seus beneficios— e, en ocasións, pode supoñer a perda de niños e poliños de píllara das dunas.

A especie non só sofre a presión das máquinas, senón tamén a do ser humano: as pisadas ou a presenza de cans na praia, que poden chegar a depredar os niños, pódenlles afectar de cheo ás poboacións de píllaras.

O Concello do Grove, segue coa campaña para protexer a especie mediante a conservación e correcta xestión das súas praias, xa que a galega é a única poboación reprodutora da costa atlántica. Entre outras medidas, fai anos que o concello cambiou as papeleiras do interior dos areais por colectores na zona de aparcadoiro. Deste xeito elimínase un foco de atracción de depredadores e evítase que o vehículo de retirada de residuos teña que pisar a area. Ademais, naquelas praias onde cría esta especie, retirouse a máquina cribadora, que pasa só puntualmente logo de grandes balumes por fortes mareas ou temporais e coa correspondente autorización de Conservación da Natureza.

O Grove quere demostrar que o uso turístico das praias e areais é compatible coa conservación dos hábitats e as especies. As actuacións previstas polo seu Concello poden contribuír a preservar un ecosistema moi particular, como é o das praias e a fronte dunar deste municipio, e supoñer significativos aumentos na diversidade e abundancia de aves e doutras especies exclusivas das praias.

Con esta proposta, o Concello do Grove dá un paso de xigante cara a un novo concepto de integración do uso turístico coa conservación do patrimonio natural dentro da recentemente creada Reserva Ornitolóxica SEO/BirdLife do Grove. Con seguridade, servirá de modelo para que outros concellos con praias e dunas onde tamén cría esta especie copien o seu modelo.

 

 
<< Inicio < Anterior 1 2 3 4 5 6 7 8 9 10 Seguinte > Final >>

JPAGE_CURRENT_OF_TOTAL
Añadir a: Yahoo Añadir a: Google Añadir a: Facebook Añadir a: Twitter
Castellano
Galego
English